Врховниот ирански верски лидер, ајатолах Али Хамнеи денеска изјави дека САД сакаат да предизвикаат регионална криза односно судир помеѓу Саудиска Арабија и Иран.
Тој ги повика САД да го напуштат Блиски Исток, наведувајќи оти „секоја сила која ќе го предизвика Иран ќе биде поразена“.
– Еден од начините да се провоцира Иран е да се користат неискусни лидери во регионот. Тие се обидуваат да испровоцираат судир помеѓу Иран и Саудиска Арабија, муслимани да се борат против муслимани, изјави Хамнеи.
Реакцијата на Хамнеи уследи по вчерашната изјава на американскиот државен секретар Мајк Помпео дека Иран е дестабилизирачки фактор на Блискиот Исток.
– Иран го дестабилизира целиот овој реон. Таа земја поддржува милиции и терористички групи. Ги снабдува со оружје бунтовниците Хути во Јемен. И го поддржува убиствениот режим на сирискиот претседател Башар ал Асад, наведе Помпео.
Тридневната турнеја на Помпео во Саудиска Арабија, Израел и Јордан е со цел да се запознаат сојузниците со американската политика кон Иран.
Аналитичарите оценуваат дека Помпео е поостар кон иранската Влада од неговиот претходник Рекс Тилерсон, кој сакаше САД да не се повлчекуваат од нуклеарниот договор со Иран.