Архиепископот на Православната црква на Финска, предупредил на можното влијание на Руската православна црква и на руските политички и геополитички интереси врз финската православна заедница.
Во интервју за финската медиумска куќа Yle, Архиепископот Илија навел дека војната на Русија против Украина предизвикала длабоки поделби не само меѓу парохјаните — особено во руско-говорната заедница во Финска — туку и во редовите на свештенството и црковната управа. Тој посочил дека дел од верниците и клириците биле изненадени и вознемирени од официјалната поддршка на Црквата за Украина.
„Понекогаш сме премногу доверливи и наивни. Мораме да останеме внимателни и да ги препознаваме знаците на непријателско влијание“, изјавил архиепископот, истакнувајќи дека црквата е во редовна координација со Финската безбедносна служба (Supo) по прашањето на ризиците од надворешно влијание.
Според неговата проценка, изборот на нов патријарх во Русија и историската блискост на некои од свештениците со Московската патријаршија — вклучувајќи студирањето во тамошните теолошки академии — создаваат сериозна основа за загриженост.
Изјавите на архиепископот Илија јасно покажуваат дека Финската православна црква е внимателна во однос насопствената безбедност, автономија и идентитет. Во услови кога руското влијание се смета за реален ризик, црквата сака да испрати порака дека нејзината лојалност е недвосмислено поврзана со финското општество и неговите демократски вредности. Внимателноста, како што истакнал архиепископот, не е израз на страв, туку на одговорност — да се зачува единството на заедницата и нејзиното слободно, независно сведоштво во време на геополитички тензии.
