Во почетокот на ноември, во централната нигериска држава Бенуе, екстремисти од полуномадските племиња Фулани извршија брутален напад во кој беа убиени најмалку десет христијани, меѓу кои и протестантскиот пастор Сајмон Н’бах од црквата Flaming Fire Ministry. Нападот се случил во селото Анвуле-Оглеву, додека христијански земјоделци работеле на своите полиња, пренесува Christian Post.
Напаѓачите запалиле зграда на католичката црква и разурнале десетици домови, оставајќи го селото во состојба на целосна разурнатост.
Локален жител за Morning Star News изјавил дека телото на пасторот било пронајдено заедно со телата на двајца други христијани. Според него, бројот на загинати може да биде и поголем, со оглед на тешко повредените, а еден христијанин е киднапиран. Друг жител сведочи дека го загубил својот вујко и братучед. Нападите траеле од 3 ноември до вечерните часови на 4 ноември. Тој потврдува дека најмалку десет христијани се убиени, а повеќе лица исчезнати. „Радикалите извршија вистински злосторства врз невини луѓе,“ додава тој.
Племињата Фулани (или Фулбе) се една од најголемите номадски етнички групи во Африка, присутни во регионот Сахел и Западна Африка. Иако мнозинството од нив се мирни муслимани, одредени кланови се радикализирани и последните години вршат насилство врз христијанските земјоделски заедници во централна Нигерија, принудувајќи ги на бегство и одземајќи им ја земјата. Многу меѓународни организации предупредуваат дека насилството достигнува ниво на геноцид, но нигериските власти тоа го сведуваат на „конфликти меѓу земјоделци и пастири“, поттикнати од климатски и економски фактори. Христијанските водачи, пак, нагласуваат дека нападите имаат и јасна религиска мотивација – насилно ширење на исламот и протерување на христијаните од нивните историски земји.
Според годишниот извештај на христијанската организација Open Doors за 2025 година, Нигерија се наоѓа на 7. место во светот според прогонство на христијани. Од 4.476 христијани убиени ширум светот во последниот период, 3.100 – или 69% – биле убиени токму во Нигерија. Покрај радикалните групи Фулани, во северните региони се активни и џихадистички организации како Боко Харам и ISWAP, додека на северозапад се појави новата екстремистичка група Лакурава, која поседува современо оружје и соработува со фракции на Ал Каеда.
Киднапирањата на христијани за откуп, нападите врз цркви и масовните убиства стануваат сè почести, при што безбедносната состојба се влошува, а државните структури често немаат контрола врз оддалечените области.
