Архиепископот Стефан му го честиташе изборот на новиот патријарх на Бугарија Даниил. Во честитката Архиепископот пишува:
Дозволете Ни од Свое и од името на архијереите, чесното свештенство, преподобното монаштво и верниот народ на Македонската Православна Црква – Охридска Архиепископија, да ја изразиме радоста и срдечно да Ви го честитаме изборот за Претстојател на Бугарската Православна Црква. Вашата богољубива и стамена личност беше препознаена од Светиот Дух, како и од членовите на Патријаршискиот изборен црковен Собор, кои во Вас видоа достоен наследник на Вашите претходници на светоимената Софиска катедра.
Бугарската Црква и бугарскиот народ со Вашиот избор добија богољубив, правдољубив и ревносен Архипастир исполнет со ревност кон Божјото слово, грижлив Патријарх кој внимава на чистотата на православната вера, но и смирен молитвеник за богомдоверената му паства, вдахновуван од евангелските зборови: Јас сум добриот Пастир. Добриот Пастир си ја полага душата своја за овците.
Семилостивиот Бог нека Ви дарува мирно и плодородно првојерархиско служење и нека го умножи и преумножи Вашето духовно стадо.
Ваш собрат и сослужител пред престолот Божји, Архиепископ, Охридски и Македонски, + Стефан
