Европратеникот со албанско потекло, Фредис Белерис остро реагирал на, како што ја нарекол, „уште една провокација на владата на Еди Рама против националниот и културниот идентитет на жителите на Химара“.
Повод за реакцијата била јавната расправа што Министерството за култура на Албанија ја одржало на 18 декември во селото Вуно, во областа Химара. На расправата биле претставени планови за реставрација и пренамена на црквата „Свети Спиридон“ и нејзината околина, при што просторот би бил трансформиран од место на богослужба во музеј посветен на Албанците од Јужна Италија.
Според Белерис, оваа заедница нема историска или културна врска со регионот. Тој истакнал дека на расправата присуствувале главно општински службеници, додека локалното население било слабо застапено, а настанот бил најавен само еден ден однапред.
Европратеникот потсетил дека на истото место, каде што се наоѓа црквата, од 1778 година до Втората светска војна функционирало грчко училиште, кое било затворено со воспоставувањето на комунистичкиот режим и укинувањето на грчкото образование. Дополнително, Белерис изразил загриженост што албанските власти не ја консултирале Православна црква на Албанија, во чија сопственост е објектот. Тој ја поврзал оваа иницијатива со, како што рекол, слични постапки на актуелната власт, потсетувајќи на уривањето на црквата „Свети Атанасиј“ во Дримадес во 2015 година. Според него, и тогаш постоеле предлози од академски кругови за создавање културен простор поврзан со Арбрешите и Грчката католичка црква.
„Оние што веруваат дека со вакви потези ќе го променат духот и верата на локалното население сериозно се лажат“, заклучил Белерис, додавајќи дека слични обиди во минатото завршиле без успех.