На 18 јануари, за време на утрински ракетен напад, со две руски балистички ракети врз централните делови на украинскиот град Запорожје, беше погоден соборниот храм „Св. апостол Андреј Првоповикан“ на УПЦ. Куполата на храмот е целосно урната.
Свештеникот Константин Костјукович изјави дека за време на нападот во храмот се наоѓал еден дежурен службеник, кој е таму 24 часа дневно, и една парохијанка која секогаш доаѓа рано. „За среќа, двајцата не настрадаа, но можете да видите што предизвика експлозијата“, рече тој.
Во советскиот период, овој храм бил кино. Во 1995 година започнало претворањето на напуштеното кино во православен храм. Епархиски архиереј во тоа време е запорожкиот митрополит Лука (Коваленко), кој е еден од најревносните поддржувачи на патријархот Кирил во УПЦ.
Запорошката епархија упати повик до граѓаните да донираат средства: „Ги молиме сите кои можат да помогнат, да префрлат средства на сметката на катедралата. Оние што имаат сили и можности, да дојдат и да помогнат во отстранувањето на последиците“. Во изјавата на митрополитот Лука се вели само дека „трагедијата е испит за нашата вера, … бидејќи знаеме дека на крајот од времињата верата ќе ослабне“. Во изјавата не се споменуваат зборовите „Русија“ или „руски“.
Украинскиот историчар и теолог Сергиј Шумило коментираше дека погодениот соборен храм е еден од ретките во Украина каде што митрополитот Лука продолжува за време на богослужбите да го спомнува московскиот патријарх Кирил како „наш господар и отец“ – формула која покажува јурисдикциска подреденост кон Москва. „Благословените ракети не избираат дали ќе паднат врз оние кои ги дочекуваат со леб и сол како поддржувачи на ’Рускиот свет‘, или врз обичните Украинци. Ова е цената на лојалноста кон Москва, но се сомневам дека дури и оваа трагедија ќе ја промени неговата позиција“, рече тој.
Од инвазијата на руската армија врз Украина во 2022 година до почетокот на 2024 година се оштетени 530 религиозни објекти, од кои 9% се целосно уништени, а 16% – неповратно оштетени. Најмногу религиозни објекти се оштетени во Донецката област – 102. Во Киевската област се оштетени 81, во Луганск – 62, во Харков – 61, во Херсон – 56, а во Запорожје – 32. Приближно половина се цркви на УПЦ. Една третина од засегнатите цркви се протестантски. Регистрирани се и случаи на гранатирање на еврејски, муслимански и хиндуистички религиозни објекти. На 23 јули 2023 година, со ракетен напад од Руската Федерација, практично беше уништена Преображенската катедрала на УПЦ во Одеса.
Во повеќето случаи, уништувањата се резултат на неселективен оган, но понекогаш и на намерни удари.
/Dveri.bg
