Колумбискиот претседател Густаво Петро предизвика силни реакции во верските кругови по изјави дадени за време на повторното отворање на болница во Богота, во кои изнесе лични и контроверзни толкувања за Исус Христос.
Во својот говор, Петро изјави дека не го нарекува Исус „Христос“, тврдејќи дека терминот е грчки и дека бил користен за да се претвори Исус во симбол на моќ и кралство, нешто што, според него, не одговара на историската фигура. Тој го опиша Исус како „човек на светлината, на вистината и револуционер“, а потоа отиде чекор понатаму со шпекулации за неговиот личен живот, изразувајќи верување дека Исус имал љубовна врска, можеби со Марија Магдалена.
Изјавите, кои брзо се проширија во јавноста, предизвикаа бран критики и обвинувања за политичка инструментализација на религијата и недостиг на историски и теолошки познавања.
Евангелската конфедерација на Колумбија, која претставува илјадници цркви и милиони верници, излезе со официјална реакција во која изрази „длабока загриженост и отфрлање“ на изјавите на претседателот. Во соопштението се наведува дека Библијата го претставува Исус Христос како свет и морално чист, а Марија Магдалена како ученичка преобразена преку верата, а не како предмет на сексуални шпекулации.
Од конфедерацијата нагласија дека ваквите изјави ја нарушуваат теолошката и историската вистина и го допираат централниот идентитет на христијанската вера. Истовремено, беше упатен повик до државните лидери да ја почитуваат верската слобода загарантирана со уставот и да избегнуваат јавни настапи кои ги повредуваат длабоките верски убедувања на граѓаните.
Критики пристигнаа и од христијански публицисти и теолози. Коментаторот Хуан Себастијан Кортес оцени дека изјавите на Петро покажуваат сериозно отстапување од новозаветната традиција, потсетувајќи дека терминот „Христос“ е превод на хебрејскиот „Месија“ и има длабоки библиски корени. Тој предупреди дека обидите да се редефинира христијанската порака низ призма на современ политички активизам водат кон релативизирање на основните верски постулати.
За голем дел од христијанските лидери во Колумбија, изјавите на претседателот не претставуваат академска дебата, туку тривијализација на верата и замена на духовната димензија на Евангелието со идеолошки интерпретации.
Настанот дополнително ги заостри односите меѓу владата и евангелските и католичките заедници, кои предупредуваат дека во плуралистичко и демократско општество слободата на изразување не смее да се користи за навредување на верските чувства на мнозинството.
