Кабинетот на Претседателот Ѓорге Иванов, објави за средбата на со Вселенскиот Патријарх Вартоломеј, вчера во седиштето на Вселенската Патријаршија во Фанар – Истанбул.
Според соопштението од неговиот Кабинет, Иванов го поканил Вселенскиот Патријарх да ја посети Република Македонија за одбележувањето на големиот јубилеј – 1000 години од формирањето на Охридската архиепископија.
-Двајцата соговорници разговарале за прашања поврзани со статусот на Македонската православна црква – Охридска Архиепископија. Претседателот Иванов истакнал дека МПЦ-ОА е жива црква, додека Вселенскиот патријарх изразил надеж дека прашањето ќе се реши.
Од кабинетот на Иванов посочуваат дека македонскиот Претстедател ги поздравил активностите и напорите на Вселенскиот патријарх за обезбедување поголемо единство во православната екумена и за помирување на христијанството со другите религии.
– Во време кога светот се соочува со тешки предизвици, потребна е заедничка посветеност и заложба во одбраната на христијанските вредности и принципи, кои настојуваме да ги споделуваме во духот на дијалогот и меѓусебната почит, истакнал македонскиот претседател.
На средбата биле разменети мислења за повеќе актуелни теми од заемен интерес.
Претседателот Иванов престојува во работна посета на Република Турција, по повод учеството на 21. Евроазиски економски самит.
За средбата на Иванов со вселенскиот патријарх, вчера јави Религија.мк
