Ден по посетата на Будимскиот Митрополит Лукијан, гостин на Бигорскиот манастир бил уште еден владика од СПЦ. Епископот Липљански г. Доситеј, викар на Патријархот Српски Порфириј го посетил манастирот, каде бил пречекан со владички почести.
-Во отсуство на Старецот на Обителта, Преосвештениот Епископ Антаниски г. Партениј, со негов благослов, ценетиот архиереј и неговата придружба беа достоинствено пречекани од манастирскиот економ Архимандритот Доситеј и од присутните браќа во Манастирот. По свеченото иподохи и многулетието во храмот, драгиот гостин беше примен во големиот синодикон, каде што разговараа со о. Доситеј за животот во Манастирот. Во продолжение, тој му ги покажа главните содржини на Манастирот, вклучувајќи ја Книгохранителницата, велат од Бигорски.
Епископот г. Доситеј се потпишал и во книгата на впечатоци, а од Бигорски објавија што напишал.
„Благодарен Му сум на Бога и на Св. Јован Претеча што се удостоив на посетата и што се поклонив на Бога во оваа света и многу древна Обител. Му благодарам и на Неговото Преосвештенство г. Партениј и на целото во Христова братство негово за укажаната љубов и гостопримство“.
