Според Гела Јапаридзе, генерален конзул на Грузија во Солун, во сржта на односите меѓу Грузија и Грција, се наоѓа заедничката православна вера. Тој нагласил дека пријателските и долгогодишни врски меѓу Православните цркви на Грузија и Грција имаат клучна улога во зближувањето на двата народа. Јапаридзе укажал на големата почит што Црквата на Грција ја покажува кон грузискиот католикос-патријарх Илија II, додавајќи дека интеракцијата меѓу високи црковни претставници е честа, вклучително и посети на Грција и Света Гора.
Посебно место во зацврстувањето на духовните и историските врски меѓу двете земји, според него, има Света Гора. Јапаридзе потсетил дека уште во 965 година свети Јован Иверски пристигнал на Света Гора заедно со својот син Евтимиј и други ученици, што довело до основањето на манастирот Ивирон. Со векови овој манастир претставувал значаен центар на грузиската духовност, култура и сокровиште на ракописното наследство. Тој изразил благодарност до сегашниот игумен и братството за грижата и зачувувањето на грузиското духовно наследство.
Јапаридзе се осврнал и на историската личност на Торнике Еристави, грузиски војсководец кој подоцна станал монах на Света Гора и живеел во Големата лавра на свети Атанасиј. Според него, Торнике одиграл клучна улога во задушувањето на големиот бунт против византискиот престол во 979 година, што дополнително ги зацврстило грузиско-византиските односи.
Тој го истакнал и ликот на свети Георгиј Карслидис, роден во Грузија, а погребан во северна Грција, кој бил канонизиран од Црквата на Грција во 2008 година. Гробот на светецот денес привлекува илјадници грузиски поклоници годишно и претставува жив симбол на трајното единство во верата меѓу двата народа.
На крајот, Јапаридзе нагласил дека историјата, културата и пред сè заедничката духовност и понатаму функционираат како силен мост на пријателство меѓу Грузија и Грција, при што Света Гора останува еден од најтрајните симболи на оваа повеќевековна поврзаност.