Зохран Мамдани, кандидат на Демократската партија и член на движењето Демократски социјалисти на Америка, е избран за нов градоначалник на Њујорк, станувајќи првиот муслиман, првиот јужноазиец и најмладиот човек во последните сто години кој ќе ја води оваа метропола, јавуваат Индекс.хр и Независен.мк.
Според Изборниот одбор на градот Њујорк, на изборите гласале повеќе од два милиони граѓани – значително повеќе отколку на претходните избори. Со преброени 90,5 проценти од гласовите, Мамдани освоил 50,4 проценти, пред независниот кандидат Ендру Куомо со 41,6 проценти и републиканецот Кертис Слива со 7,1 процент.
По прогласувањето на победата, Мамдани пред своите приврзаници во Бруклин изјави:
„Вечерва победивме. Иднината е во наши раце. Соборивме политичка династија и ја свртуваме страницата на политика што ги напушта многумина и им служи на малкумина. Ќе се бориме за вас, затоа што ние сме вие.“
Роден во Уганда во 1990 година, Мамдани израснал во Њујорк, каде што се преселил со своето семејство кога имал седум години. Тој е син на познатата индиска режисерка Мира Наир и уганданскиот академик Махмуд Мамдани. Потеклото и имигрантското искуство често ги наведува како извор на својата политичка емпатија и мотив за општествена правда.
Мамдани првпат се вклучил во политиката како организатор на движења за права на домување во Квинс. Во 2020 година бил избран во Државното собрание на Њујорк, а неговиот стил на политичко делување – едноставен јазик, директен контакт со граѓаните и силна активистичка енергија – му донесе голема поддршка кај младите гласачи.
Како отворен демократски социјалист, Мамдани се залага за бесплатен јавен превоз, универзална грижа за деца, замрзнување на кириите и прогресивно оданочување на најбогатите. Тој е познат и како критичар на израелската политика и поддржувач на палестинските права, став што предизвика бурни реакции во дел од американската јавност.
Аналитичарите оценуваат дека неговата победа означува нова етапа за левицата во САД, како и промена во генерациската и идеолошката динамика на Демократската партија. Поддршката што ја ужива од влијателни личности како Александра Окасио-Кортез и Берни Сандерс дополнително ја зацврстува позицијата на прогресивното крило во американската политика.
Со изборот на Мамдани, Њујорк добива градоначалник кој ветува дека ќе ја води најголемата американска метропола „рамо до рамо“ со граѓаните, со порака дека надежта и промена се можни дури и во системи што долго изгледале непроменливи.
