Пахомије служеше со Архиепископот, а не го спомнува ниту неговото име

Врањскиот епископ Пахомиј бил во манастирот Свети Јоаким Осоговски, кај Крива Паланка, сослужиувал со Архиепископот Стефан, неколку владици на МПЦ-ОА и еден епископ од Бугарската православна црква и се вратил во Врање, од каде го направил најголемото понижување на МПЦ-ОА.

На неговата епархиска страница објавил вест за манастирската слава за Светиот Јоаким Осоговски во која не го ниту споменува името на Архиепископот Стефан, ниту пак името на црквата во чиј манастир сослужувал. Себе си си ја ставил новата титула Архиепископ, го посочил домаќинот на чија покана бил и толку. Дека таму служел Архиеископот на МПЦ-ОА не е важно за споменување, исто како што нема потреба да се споменуваат ѓаконите кои учлествуваат во литургијата. Дека бил на сослужение во друга помесна православна црква, веќе одмна СПЦ тоа не го забележува, така што тој дел и не е некоја новост.

-По повод манастирската слава на Преподобниот Јоаким Осоговски, Неговото Високопреосвештенство, Архиепископот и митрополит Врањски. г. Пахомије, на покана од Митрополитот Кумановско-осоговски г. Григориј, сослужуваше во Архијерејската Божествена Литургија во Свети Јоаким Осоговски, кај Крива Паланка во Северна Македонија. По завршувањето на литургијата беше поставен камен-темелник за нов манастирски конак, пишува во веста од Врањската епархија.

Но, за да понижувањето биде комплетно, свесно или несвесно се погрижил и домаќинот и тоа уште во најавата за настанот. Во поканата пишува дека „Светата архијерејска литургија ќе ја служи Архиепископот Охридски и Македонски г.г. Стефан со Неговото Високопреосвештенство, Митрополит Кумановско-осоговски г. Григориј“.

Како тоа Архиепископот ќе ја служи литургијата „СО“? Двајца Архиепископи ли се? Што се другите владици, сослужители на двајцата служители? Ако Архиепископот служи, тој чиноначалствува, а сите останати кои учествуваат во литугријата се сослужители.