Металната ограда, која веќе 10 години го крие градилиштето на црквата „Свети Константин и Елена“, на улица „Македонија“, ќе биде тргната од страна на Инспекторатот на општина Центар, пишува Вечер Пресс.
Оттаму велат дека внатре во заградениот простор не се вршат никакви градежни активности и дека време е оградата да се тргне и внатрешниот простор да се расчисти.
Градбата на црквата почна 2012 година и неа ја градеше Македонската православна црква и Фондацијата „Св. Цар Константин“, која што беше формирана од МПЦ за изградба на црквата.
Груевски организираше три донаторски конференции со македонски компании за да се соберат пари за изградба. Градежната компанија „Бетон“, која го градеше објектот, престана со активности поради тоа што не и беа префрлани средства за натамошна изградба и работите. Приватната болница „Ре-Медика“ пред 1,5 година го презеде преостанатиот долг од околу 3,5 милиони евра.
Во 2013 имаше насилни протести пред Општина Центар, организирани од фантомска организација со цел да спречат наводно уривање на црквата од страна на тогашниот градоначалник Андреј Жерновски. За протестите имаше долго судење што заврши во септември 2020 со затворска казна од 1,5 години за Груевски како нарачател на насилствата.
