Градските власти на Квебек Сити донеле одлука да го отстранат распетието кое со децении беше изложено во салата на Градскиот совет, повикувајќи се на принципот на државна секуларност и неутралност, информира The Christian Post. Одлуката дошла во рамки на пошироката политика на канадската покраина Квебек за одвојување на државата од религиозните симболи и институции.
Според градската администрација, отстранувањето на распетието има за цел да обезбеди институционална неутралност и да испрати порака дека локалната власт им припаѓа подеднакво на сите граѓани, без оглед на нивните верски убедувања. Градоначалникот изјавил дека одлуката не е насочена против христијанството, туку претставува усогласување со современите правни и општествени стандарди за секуларна управа.
Распетието, кое долго време е дел од просторот каде се носат клучни политички одлуки, за многумина претставуваше историски и културен симбол на франкофонското и католичко наследство на Квебек. Критичарите на одлуката сметаат дека со ваквиот потег се брише дел од идентитетот и историјата на градот, додека поддржувачите ја поздравуваат како чекор кон поголема инклузивност и почит кон верската разновидност.
Одлуката предизвикала реакции и надвор од Квебек, повторно отворајќи ја дебатата за местото на религиозните симболи во јавниот простор, особено во општества со силно историско христијанско наследство, но и со растечка културна и религиска разновидност.
Градските власти најавиле дека распетието ќе биде пренесено во музејски или друг соодветен контекст, каде ќе биде претставено како дел од историското наследство, а не како активен симбол во политичкиот живот.