Година откако ураганите Хелен и Милтон предизвикаа сериозни разорувања во југоисточниот дел на САД, хуманитарната организација Меѓународни православни христијански добротворни организации (IOCC) ја одбележла својата посветеност со континуираната поддршка за жртвите — од итна помош, па до повторно градење на домови.
Една од погодените, госпоѓа Пат од источен Тенеси, изјавила дека нејзиниот дом бил сериозно оштетен од поплавата. По бурата, таа сè што имала делела со соседите. Неколку месеци подоцна, волонтери од IOCC ѝ помогнале да постави нов под, да почне демонтажни работи, санирање, а истовремено ѝ биле обезбедени и основни услови за живот.
Во текот на оваа година, IOCC заедно со локалните организации и донатори извршила чистење на 37 домови, започнала 45 процеси на поправка и повторна изградба, а во некои случаи обновата е веќе во завршна фаза. Покрај тоа, преку различните активности — од поправки, обнова до логистичка и психолошка помош — еднократна помош добиле и стотици семејства.
IOCC најавила дека ќе продолжи со својата работа и во 2026 година, со приоритет да се обезбеди долгорочна стабилност: безбедно домување, поддршка за семејствата и модели за отпорност на идни кризи. Организацијата во координација со локални партнери ќе направи обид да ја насочи помошта таму каде што ќе биде најпотребно.
IOCC од 1992 година наваму делува како хуманитарна и развојна агенција на Соборот на канонските епископи во САД. Во досегашната историја обезбедила повеќе од 858 милиони долари помош и развојни програми во над 60 земји — од Африка, Европа и Блискиот Исток, до САД.
Оваа обнова не е само поправка на ѕидови. Тоа е човечка грижа, соработка, вера што станува дело. Во време кога катастрофите редовно ги туркаат луѓето на работ — ваквите иницијативи стануваат повеќе од помош: се референца за солидарност, човечност и одговорност кон ближниот.
