Архиепископот на Тијатир и Велика Британија од Вселенската Патријаршија, упатил духовна порака во која нагласил дека Божјата благодат секогаш ја надминува човечката слабост, потсетувајќи на апостолските зборови дека „таму каде што се намножи гревот, преизобилно се излеа благодатта“. Во своето обраќање, тој истакнал дека христијанската надеж не произлегува од човечкото совршенство, туку од милоста и љубовта на Бога, Кој постојано го повикува човекот кон покајание и обновување.
Архиепископот подвлекол дека современиот свет се соочува со сериозни морални и духовни предизвици, но дека тие не смеат да бидат повод за очај. Напротив, токму во времиња на криза и духовна збунетост, Црквата е повикана да сведочи за преобразувачката сила на благодатта, која ги исцелува раните и го обновува човекот. Тој нагласил дека Божјата љубов не е ограничена од човечките падови и дека Христовото присуство во светот секогаш носи можност за нов почеток.
Во пораката било нагласено дека благодатта не ја поништува човечката одговорност, туку ја осмислува. Архиепископот повикал верниците да го прифатат духовниот живот како постојан пат на покајание, смирение и љубов, во кој човекот учи да одговори на Божјиот повик со слободна волја и доверба. Според него, токму преку оваа синергија меѓу Божјата благодат и човечкиот напор се остварува вистинското христијанско сведоштво.
Toj, исто така, потсетил дека Црквата постои за да го објавува Евангелието не како осуда, туку како вест за спасение. Повикувајќи се на примерот на Христос, тој истакнал дека мисијата на Црквата е да ги прегрне сите луѓе, особено оние што се чувствуваат оддалечени или оптоварени од гревот, нудејќи им надеж, утеха и пат кон духовна преобразба.