Истакнатиот републикански сенатор Чак Грасли од сојузната држава Ајова одржал говор во Сенатот на Соединетите Американски Држави на тема „Религиозната слобода во Украина“, во кој ја осудил руската војна во Украина и улогата што ја игра Руската православна црква.
Грасли остро го критикувал ставот на лидерот на Руската православна црква, патријархот Кирил, кој ја благословил руската инвазија, и ги оценил како невистинити изјавите на дел од претставниците на црквата кои биле на посетa во Вашингтон, а тврделе дека Руската православна црква е жртва на верски прогон. „Не верувајте на никого што тврди дека Руската православна црква на кој било начин е била жртва на религиозно преследување во оваа војна во Украина, која започна со руската инвазија во февруари 2022 година“, рекол Грасли, нагласувајќи дека според него токму Руската православна црква е водечки извршител на прогон на православни, католици, евангелисти и други верски заедници.
Во говорот, тој споменал дека пред две години во својот кабинет се сретнал со околу 30 религиозни лидери од Украина, меѓу кои православни, католици, евангелисти, Евреи и муслимани, кои му рекле дека во Украина се практикува религијата слободно. Напротив, според Грасли, во украинските територии под руска окупација, црквите биле користени како дел од државната структура, а на пастирите им се вршел притисок да ги контролираат верниците и да ги принудуваат да се молат во тајност.
Сенаторот се повикал и на извештајот на фондацијата „Слободна Русија“, во кој се наведува дека Руската православна црква ја поддржувала војната преку пропаганда, религиозни ритуали за окупаторите и дипломатски активности.
Грасли истакнал дека само мал дел од православните христијани во Украина се идентификуваат со црквата поврзана со Москва, додека мнозинството припаѓа на Православната црква на Украина, која е призната од Вселенскиот патријарх на Константинопол. Кон крајот на говорот, тој ја цитирал изјавата на Вселенскиот патријарх според која благословувањето на војната од страна на патријархот Кирил „му нанесува штета на угледот на православието, бидејќи православието не поддржува војна, насилство и тероризам“.
Сенаторот Грасли повикал да не се верува на тврдењата дека Руската православна црква е прогонета, туку дека таа игра активна улога во рамки на конфликтот, вклучително во верскиот и социјалниот контекст на војната.
На крајот од обраќањето, Грасли уште еднаш предупредил дека тврдењата за прогон на Руската православна црква во Украина претставуваат дезинформација и дека, според достапните податоци, токму таа црква игра централна улога во верските репресии во контекст на руската инвазија.