Свештеник на Украинската православна црква (УПЦ-МП), познат како отец Анатолиј, минатата недела бил ослободен од постапка за воена мобилизација, откако надлежните во регрутниот центар добиле потврда дека постои наредба за иземање на свештенството од мобилизација.
Инцидентот се случил кога свештеникот бил запрен од полиција додека управувал возило и веднаш бил одведен во локалниот Територијален центар за регрутација. Таму започнала постапка за негово вклучување во воена служба, вклучително и фотографирање за воена легитимација.
Неколку минути подоцна, командантот на центарот интервенирал и ги информирал службениците дека постои јасна инструкција свештени лица да не бидат регрутирани. По ова, отец Анатолиј бил веднаш пуштен на слобода.
Настанот се случува во период кога прашањето за мобилизацијата на свештеници од УПЦ повторно е актуелизирано. Во изминатите години, повеќе свештеници и архиереи на оваа Црква биле повикани или приведени во рамки на мобилизациските постапки. Во септември годинава, еден епископ на УПЦ бил задржан во таква постапка.
За разлика од свештенството на некои други верски заедници во Украина, свештениците на УПЦ немаат јасно уреден законски статус кој автоматски ги ослободува од воена обврска, што според нивните претставници претставува дополнителен правен и општествен проблем.