Вселенскиот патријарх Вартоломеј утринава ја посети болничката црква „Свети Пантелејмон“ во рамки на болницата Хипократио во Солун, каде што се обрати до медицинскиот персонал, пациентите и нивните семејства, нагласувајќи ја грижата на Мајката-Црква за болните и страдалниците, со особено внимание кон децата.
Во своето обраќање, Патријархот истакна дека Црквата се грижи за духовните потреби на човекот, додека медицината ја ублажува телесната болка, подвлекувајќи дека меѓу верата и науката не постои спротивставеност, туку хармонична соработка во служба на човековото спасение и благосостојба. „Одиме заедно. Нема ривалство меѓу науката и религијата, ниту меѓу науката и христијанската вера“, порача Вселенскиот патријарх.
Тој посебно се осврна на децата кои боледуваат од тешки болести, како леукемијата, нагласувајќи ја потребата од медицинска грижа, но и од човечка топлина и емоционална поддршка. Воедно, ја пофали пожртвуваноста и посветеноста на лекарите и медицинските сестри од Педијатриската клиника на болницата.
Во рамки на посетата, Патријархот ги посети просториите на Педијатриската клиника, Детското одделение и Одделот за детска онкологија.
