Меѓународна организација која го следи прогонот на христијаните изрази остар приговор против вклучувањето на Обединетите Арапски Емирати во таканаречениот „Одбор за мир“, иницијатива најавена од американскиот претседател доналд Трамп. Според организацијата, ваквиот потег го поткопува кредибилитетот на телото и може да ги ослабне меѓународните механизми за одговорност и владеење на правото.
Британската организација Christian Solidarity Worldwide соопшти дека претставникот на ОАЕ, исто така, не треба да биде дел од мировна структура, имајќи ги предвид обвинувањата дека неговата држава има улога во граѓанската војна во Судан. Според тврдењата, ОАЕ обезбедува поддршка за паравоените Сили за брза поддршка, формација обвинета за сериозни воени злосторства.
Во Судан, од април 2023 година траат жестоки борби меѓу Силите за брза поддршка и суданската армија. Меѓународни проценки говорат за најмалку 150 илјади загинати, повеќе од 13 милиони раселени и околу 30 милиони луѓе на кои им е потребна хуманитарна помош.
Од Christian Solidarity Worldwide наведуваат дека учеството на ОАЕ во „Одборот за мир“ е во спротивност со улогата што земјата, според нив, ја има во суданскиот конфликт. Според директорката за застапување на организацијата, ваквиот ангажман изгледа лицемерен и отвора сериозни прашања за легитимноста на новото тело.
Администрацијата на Трамп го претстави Одборот за мир како преодна структура за управување со повоениот појас Газа, со мандат за стабилизација, реконструкција и инвестиции. Телото беше формално одобрено со резолуција на Советот за безбедност на Обединетите нации кон крајот на 2025 година и официјално започна со работа овој месец, при што самиот Трамп е наведен како претседател.
ОАЕ беа меѓу првите држави што ја прифатија поканата за учество, што дополнително ја засили критиката на дел од меѓународната јавност. Извршниот комитет на одборот вклучува и високи политички фигури од САД и Европа, а неговата работа веќе предизвикува дебати за тоа дали се заобиколуваат постојните меѓународни механизми за санкционирање на воени злосторства и репресија.
Критичарите предупредуваат дека вклучувањето на влади кои се соочуваат со сериозни обвинувања за кршење на човековите права ја доведува во прашање самата идеја за мировно посредување и може да испрати опасна порака за неказнивост во глобалната политика.
