Само 27 проценти од возрасните во Соединетите Американски Држави сметаат дека пасторите имаат високо или многу високо ниво на чесност и етичност, покажуваат најновите податоци од истражување на Lifeway Research, базирано на анализи на Gallup. Станува збор за дополнителен пад од три процентни поени во однос на 2024 година, која веќе беше регистрирана како најниска точка досега.
Истражувањето укажува на долгорочен тренд на опаѓање на јавната доверба во свештенството, кој трае повеќе од една деценија. За споредба, во средината на 1980-тите години дури 67 проценти од Американците ја оценувале чесноста и етиката на свештениците како висока.
Според резултатите, 6 проценти од испитаниците им даваат многу висока оценка на пасторите, додека 21 процент ги оценуваат како високо етични. Истовремено, половина од анкетираните сметаат дека нивната чесност е на просечно ниво. Околу 18 проценти имаат негативна перцепција, од кои 12 проценти ја оценуваат чесноста како ниска, а 6 проценти како многу ниска, додека 7 проценти не се изјасниле.
И покрај падот на довербата во поединечните пастори, истражувањето бележи умерено зголемување на општата доверба во организираната религија. Во 2025 година, 36 проценти од возрасните изјавиле дека имаат голема или умерена доверба во Црквата како институција, што претставува раст во однос на 2022 и 2024 година.
Анализата покажува дека ерозијата на довербата не е ограничена само на религиозните лидери. Од вкупно 20 професии опфатени со истражувањето, 15 бележат пад на позитивните оценки. Сепак, падот кај пасторите е најизразен во последните дваесет години – од просечни 56 проценти меѓу 2000 и 2009 година, до сегашните 27 проценти.
Истражувачите го поврзуваат овој тренд со серијата скандали поврзани со сексуална злоупотреба и прикривање на случаи, кои започнаа да излегуваат во јавноста по 2002 година, најпрво во рамките на Римокатоличката црква, а подоцна и во други христијански заедници.
Демографските податоци откриваат значајни разлики во перцепцијата. Довербата кај белите Американци изнесува 33 проценти, додека кај небелите само 18 проценти. Возраста исто така игра улога: само 17 проценти од лицата до 34 години имаат висока доверба во пасторите, наспроти 38 проценти кај оние над 55 години.
Политичката припадност дополнително го продлабочува јазот. Висока доверба во свештенството изразиле 36 проценти од републиканците, 25 проценти од демократите и 24 проценти од независните гласачи.
Иако пасторите сè уште се позиционирани во групата професии со благо позитивен рејтинг, заедно со наставници, полицајци и погребни работници, тие значително заостануваат зад најдоверливите професии како медицинските сестри, лекарите и воените ветерани.
