Склучувањето брак не е забрането за муслиманите за време на светиот месец Рамазан, но не е препорачливо поради ограничувањата на постот во однос на брачниот живот, изјавил за РИА Новости помошникот на претседателот на Духовното собрание на муслиманите на Русија, Илнур Гајнутдинов.
-Во исламот како таков нема ограничување: во секое време, во секој период може да се склучи никах (склучување брак – заб. ред.). Единствената напомена е дека во книгите по фикх (исламско право – заб. ред.) се наведува дека во месецот Рамазан не е пожелно тоа да се прави, бидејќи сопругот и сопругата не можат да се осамат по читањето на никахот“, изјави Гајнутдинов.
За време на постот, објасни тој, од изгрејсонце до зајдисонце се забранети храната, пијалакот и брачната блискост.
„Тоа се трите главни причини поради кои во месецот Рамазан се смета дека читањето на никах е непожелно. Но тоа не ги спречува многумина – тие умеат да се контролираат, а нема ограничување по зајдисонце до изгрејсонце, односно до времето кога се завршува утринскиот оброк – суфур. Затоа не постојат такви строги забрани“, заклучи помошникот на муфтијата.
Рамазан во 2026 година започна на 18 февруари по зајдисонце и ќе трае до 19 март вклучително. Годишниот пост во Рамазан е задолжителен за муслиманите. Во тој период, од изгрејсонце до зајдисонце, е забрането јадење и пиење.
