Св. Синод на автономната Критска православна црква изразил длабока загриженост поради растечкиот дух на насилство, агресија и омраза во општествениот живот на островот, по трагичниот инцидент во планинското село Воризиа, во близина на Ираклио. Во вооружената пресметка меѓу две семејства со подолга историја на меѓусебни судири, загинале 39‑годишен маж и 56‑годишна жена, а 15 лица биле повредени.
Според објавените детали, инцидентот е дел од подолгорочни несогласувања поврзани со спорови за имот и „повредена“ чест — феномен кој, иако сѐ поретко, сѐ уште постои во некои критски заедници. На 1 ноември, пред еден од имотите била поставена експлозивна направа, по што избувнале оружени пресметки со калашникови и со ловни оружја. Полицијата е во потрага по учесници кои се осомничени за инцидентите.
Како последица на нарушената безбедност, локалните власти донеле мерки за заштита: училишта и детски градинки во селото привремено се затворени, а полициското присуство е зголемено додека трае истрагата. Историските податоци покажуваат дека во 50‑те години на минатиот век, во истото село исто така имало случај на крвна одмазда, што укажува на длабоко вкоренет социјален проблем. Оваа појава е присутна меѓу поконзервативните и изолирани структури, каде што постарите генерации и понатаму ги воспитуваат младите на омраза и одмаздољубивост. Ваквиот начин ја загрозува безбедноста на целата заедница и доведува до непоправливи страдања.
Во својата пастирска порака, архиереите истакнале дека ваквите насилни дејства не се во согласност со традиционалните вредности на Крит — доблест, чесност и достоинство, ниту со православната вера и традиција. Тие упатиле тивок, но јасен апел: да се прекине низата на одмазди, да се бара правдата преку институциите на Законот, а не со крвна одмазда, и да се работи на помирување и социјална обнова преку црковно и општествено делување.
Во повикот на Синод се вели: „Изразуваме жалење и прашуваме: кон што одиме во нашето секојдневие, проткаено со насилство, агресија и омраза? Како се можни вакви појави на остров познат по својата храброст и морал, по интегритетот, напорната работа и чесноста на својот народ? Она што го гледаме денес не е вековниот Крит, тоа не е Крит што го заслужуваме. Ја споделуваме со сите нашата вознемиреност и загриженоста и ве покануваме на разумен и одговорен пристап кон проблемите со криминалот и насилството… Да се помолиме сите заедно мирот и разумот да завладеат во нашите срца, во нашите животи и во нашето општество со молитвеното застапништво на светиите од Крит… Ги повикуваме сите на единство, самокритичност, воздржаност и покајание“.
Трагичниот настан го актуелизира и прашањето за ширењето и лесната достапност на огнено оружје на островот. Локалните и државните чинители – од полицијата до црквата и општинските власти – ќе бидат повикани да ја поддржат работата на социјалните служби и да промовираат програми за помирување и медиација меѓу семејствата и заедниците.
