Руската православна црква ја изразила својата поддршка за изјавата издадена од генералниот секретар на Светскиот совет на цркви, Џери Пилај, во врска со неодамнешните случувања во Венецуела и апсењето на претседателот Николас Мадуро.
Во соопштението, генералниот секретар на ССЦ предупредил дека нападите поставуваат опасен глобален преседан со нормализирање на употребата на вооружена сила за постигнување политички цели. „Овие акции поставуваат опасен преседан и пример за другите кои сакаат да ги отфрлат сите ограничувања против употребата на вооружена агресија и брутална сила за постигнување политички цели“, напиша Пилај.
Тој повика на итно прекинување на нападите и на обновено почитување на принципите на меѓународното право и државниот суверенитет. Исто така, апелирал до меѓународните тела да преземат брзи мерки. „Светскиот совет на цркви итно повикува на прекин на ваквите напади, на почитување на принципите на меѓународното право и суверенитетот на државите и на решавање на споровите преку дијалог и дипломатија, а не преку вооружено насилство“, се вели во соопштението, каде што се ушпатува апел до Обединетите нации да интервенираат за да се обезбеди усогласеност со меѓународните повелби и конвенции.
Во соопштението објавено од РПЦ, пак, се истакнува дека изјавата на ССЦ — глобално тело кое обединува православни и други христијански цркви — содржи повик за дијалог, мир и справување со основните причини за страдање на народот на Венецуела. Според РПЦ, позицијата на ССЦ е конструктивна и во согласност со етичките и благовесни вредности на христијанството, кои нагласуваат дека решенијата на општествените и политички тензии треба да се наоѓаат низ праведен и мирен дијалог.
Во соопштението се подвлекува дека црквите имаат улога да ги поддржуваат иницијативите кои водат до помирување и излез од кризите низ патот на правдата и слободата, врз основа на христијанските вредности.
Оваа реакција следи во време на продолжени политички тензии и општествени предизвици во Венецуела, каде што хуманитарните и социјалните проблеми влијаат врз животот на милиони луѓе.
