Московското регионално собрание го усвоило законот „За некои прашања од областа на заштитата на здравјето на мајките и децата и мерките за спречување на абортус во Московскиот регион“. Документот има за цел да ја намали бројноста на абортусите и да создаде систем на општествена и медицинска поддршка кој ќе ги охрабри жените да ја задржат бременоста, ставајќи акцент врз традиционалните семејни вредности.
Законската иницијатива била подготвена со благослов на патријархот Кирил, како претседател на Светскиот руски народен собор, со поддршка од гувернерот на регионот. Во изработката активно учествувале претставници на регионалниот огранок на Соборот, Правната служба на Московската митрополија и Патријаршиската комисија за семејство, мајчинство и детство.
Законот следи по дискусиите на 27. Светски руски народен собор, чија резолуција ја истакнала потребата од едукација на општеството во духот на отфрлање на абортусот, што е клучен фактор за заштита на животот, отстранување на абортусите од листата на медицински услуги на приватните клиники, зајакнување на медицинското и социјалното советување, како и мерки за заштита на мајчинството.
Законот предвидува создавање центри за медицинска и социјална поддршка на бремените жени, воведување специјални комуникациски модули за лекарите за да развиваат позитивен став кон раѓањето, како и задолжително информирање за ризиците и можните последици од абортусот. Посебен акцент е ставен на спречување на „принудување кон абортус“, што ги опфаќа сите видови притисок, поткуп или измама со цел прекин на бременоста.
Раководител на секретаријатот на Соборот ја поздравил одлуката и ја опишал како „конкретен и навремен одговор на повикот на патријархот“. Според него, воспоставувањето центри за поддршка значи дека државата ја презема улогата на заштитник на животот и помошник на жените во кризна ситуација. Тој посочи дека 28 руски региони веќе усвоиле закони со кои се забранува принуда за абортус, но Московска област прва воведува обемен и системски модел на државна поддршка за заштита на човечкиот живот и поддршка на мајчинството.
Тој изразил надеж дека примерот на Московскиот регион ќе послужи како основа за понатамошен развој на законодавството на федерално ниво, со цел, како што рекол, „заштита на човечкиот живот и одговорност за идните генерации“.
