Митрополитот Иринеј престојувал во градот Аминдео, каде што по покана на Школата за родители одржалпредавање на тема: „Празници со екрани или празници со лица?“
Во своето обраќање, митрополитот Иринеј се осврнал на современиот предизвик што го носи прекумерната употреба на технологијата и дигиталните екрани, нагласувајќи дека тие значително влијаат врз квалитетот на комуникацијата и начинот на кој луѓето ги доживуваат празниците.
Тој истакнал дека големите христијански празници, а особено Божик, не можат да се сведат на површно или виртуелно искуство, туку повикуваат на вистинска присутност, лична средба и суштински односи меѓу луѓето. Според него, празничните денови се време за внатрешно духовно созревање, зацврстување на семејните врски и вистинска комуникација преку личен контакт и заедништво.
Посебен акцент бил ставен на улогата на семејството и одговорноста на родителите во насочувањето на децата кон разумна и правилна употреба на технологијата, така што таа да служи како помошно средство, а не како замена за човечката близина и дијалог. Предавањето предизвикало интерес кај присутните, отворајќи простор за понатамошен разговор за вистинското значење на празниците во современиот дигитален контекст.