Утринава, во духот на возобновената бадникова традиција, дел од учесниците на Бадникови поворки 2026, ја посетија Претседателката на Републиката, Гордана Силјановска-Давкова.
Со божикната песна „Вечниот Бог“, детските ангелски гласови ја исполнија средбата со радост, светлина и празнична возвишеност, најавувајќи го Христовото Рождество на најубав можен начин – искрено, чисто и со отворено срце.
-Следеше исклучително топла, срдечна и радосна средба, со што уште еднаш се потврди значењето на оваа традиција која ги спојува генерациите, ја зацврстува верата и ја буди надежта за поубава иднина. Оваа празнична средба е вовед во централната Бадникова манифестација, која денеска се одржува на Плоштад „Македонија“ во Скопје и во уште 80 градови и населени места низ Татковината и во дијаспората. Манифестацијата е поддржана од Министерството за култура, Град Скопје и сите македонски општини, стои во соопштението.
