Православната црква на Украина одбележи седум години од Обединувачкиот собор, одржан на 15 декември 2018 година во Киев, на кој беше создадена единствена автокефална Православна црква на Украина. Настанот се сметаза пресвртница во современата црковна историја на земјата и претставува резултат на долг процес на обединување на претходно раздвоените православни јурисдикции во Украина.
Обединувачкиот собор се одржа во катедралниот храм „Света Софија“ во Киев, со учество на архијереи, свештенство и делегати од Украинската православна црква – Киевска патријаршија, Украинската автокефална православна црква, како и поединечни архиереи од тогашната Украинска православна црква под јурисдикција на Московската патријаршија. На соборот бил избран првиот поглавар на новоформираната Црква – митрополитот Киевски и на цела Украина, Епифаниј.
По соборот, на 6 јануари 2019 година, Вселенската патријаршија ѝ додели Томос за автокефалност на Православната црква на Украина, со што официјално беше признаен нејзиниот канонски статус. Од тој момент, Црквата на Украина започна да се консолидира институционално, духовно и пастирски, и постепено да ја зацврстува својата позиција како Помесна православна црква.
Според Orthodoxtimes, во изминатите седум години, Православната црква на Украина се соочи со сериозни предизвици, меѓу кои и внатрешни поделби, надворешни притисоци и сложени меѓуцрковни односи, особено во контекст на војната во Украина. Истовремено, Црквата продолжи да развива богослужбен, образовен и социјален живот, нагласувајќи ја својата улога во поддршката на општеството и зачувувањето на духовниот идентитет на народот.
Одбележувањето на годишнината од Обединувачкиот собор се доживува како потсетник на историскиот пат што го помина украинското православие во насока на црковна самостојност, но и како симбол на стремежот кон единство, канонски поредок и духовна независност.