Православната црква на Украина одбележа седум години од добивањето на Томосот за автокефалност од Вселенската патријаршија, со што беше означен нов период во нејзиниот црковен и општествен развој.
По повод годишнината, Киевскиот митрополит Епифаниј, заедно со делегација на Православната црква на Украина, престојуваше во Константинопол, каде што оствари средба со Вселенскиот патријарх Вартоломеј и учествуваше во заедничка молитва и евхаристиско општење. Посетата беше оценета како израз на благодарност кон Мајката-Црква за признавањето на автокефалниот статус.
Во своето обраќање, митрополитот Епифаниј истакна дека Томосот, потпишан во 2019 година, претставувал историски чекор со кој било обновено црковното достоинство на украинското православие по векови зависност и притисоци. Според него, автокефалноста ѝ овозможила на Црквата послободно да ја извршува својата пастирска мисија и да биде поблиска до верниците во сложени општествени околности.
Тој нагласи дека оваа годишнина не е само симболичен датум, туку и потсетник на одговорноста на Црквата да чекори заедно со народот, зачувувајќи ја верата и надежта за идните генерации. Во рамки на посетата беше упатена и молитва за мир во Украина и за утврдување на единството на помесната Црква.
Во поширок контекст, митрополитот Епифаниј во последните обраќања јавно ја осудува идеологијата на таканаречениот „руски свет“, оценувајќи ја како спротивна на христијанските вредности и на основната евангелска заповед „не убивај“. Тој нагласува дека верата не смее да се користи како средство за оправдување на насилство и војна.
Како дел од процесот на дистанцирање од руското црковно и идеолошко влијание, Православната црква на Украина во 2023 година премина на новојулијанскиот календар, одлука која беше образложена како израз на волјата на верниците и на стремежот кон јасен идентитет на автокефалната Црква.
