Двајца свештеници на Украинската православна црква (Московска патријаршија) загинаа како последица на руски воени дејства во различни делови на Украина кон крајот на декември 2025 и почетокот на јануари 2026 година.
На 5 јануари 2026 година, во Херсонската област, при напад со руски дрон беше убиен протоереј Георгиј Горбенко, настојател на храмот „Покров на Пресвета Богородица“ во селото Орлово. За трагичниот настан информираше свештеникот Иван Гордиенко од храмот „Св. Касперовска икона на Богородица“, кој исто така бил погоден од руски напади. Херсонската епархија изрази сочувство до семејството и верниците и повика на молитви за покој на неговата душа.
Отец Иван Гордиенко напиша дека храмскиот комплекс повторно бил гранатиран, по петти пат, при што речиси сите прозорци биле искршени. „Веќе нема емоции… солзите одамна се исплакани“, посведочил свештеникот.
Неколку дена претходно, на 29 декември 2025 година, при руски артилериски напад во Донецката област загина протоереј Василиј Киико, настојател на храмот „Покров на Пресвета Богородица“ во селото Гришино. Покровското викаријатство на УПЦ (МП) го опиша како искрен пастир кој останал со своето паство и во најтешките моменти, молејќи се за мир и поддржувајќи ги луѓето погодени од војната.
Во исто време, Воениот оддел на Московската патријаршија го објави својот годишен извештај за 2025 година, во кој наведува дека околу 150 руски воени свештеници секојдневно дејствуваат на првата борбена линија во Украина. Во текот на годината, 640 клирици извршиле вкупно 1.315 командировки во зоната на борбени дејства, а од почетокот на војната бројот на духовници кои биле испратени на фронтот надминал 2.000.
Според извештајот, во 2025 година осум свештеници биле ранети, од кои еден тешко, со ампутација на нога. Воениот оддел наведува дека дел од клириците ја доживуваат руската окупација како „крстоносен поход“, а поставувањето крстови на окупираните и ослободените територии го сметаат за дел од својата мисија.
Од почетокот на руската инвазија врз Украина во февруари 2022 година, според официјални податоци, уништени се повеќе од 600 храмови и молитвени домови, најголем дел од нив православни. Во истиот период се убиени околу 70 свештеници и монаси, како и повеќе од 14.000 украински цивили, меѓу кои околу 700 деца.
