Голем број бугарски манастири и селски цркви се во распаѓање и никој не води грижа за нивната состојба. Бугарските медиуми посочуваат дека Црквата ги остава на забот на времето овие бугарски православни светилишта, кои секојдневно се распаѓаат иако имаат голема историска важност.
Станува збор за заборавени манастирски објекти и цркви на територијата на цела Бугарија, во кои со години никој не влегува.
Овие објекти веќе подолго време ги фотографира авантуристички фотограф, Мартин Балтаџиев, кој има намера сите овие разурнати храмови на БПЦ да го документира во монографија.
Тој за бугарските медиуми изјавил дека секоја година, овие објекти, се повеќе пропаѓаат.
-Книгата ја насловив како „Изгубена вера – последно отворени врати“. Тоа е метафора за овие објекти, кои патувајќи ги открив и на многу непристапни места. До нив патеките се обраснати со трње и трева, вратите тешко им се отвораат. Тоа е изгубена вера. Голем дел од овие храмови се разурнати во целост. Онаму каде што тие се уште некако се одржуваат, тоа е благодарение на тамошните мештани. За споредба можам да ги посочам државите околу нас како Македонија, Романија, Света Гора, Грција, каде исто така сум слика. Таму луѓето вложуваат неверојатни напори, труд, средства за туризам, градба и реконструкција на цркви и да ги заштитат вредностите, изјавил фотографот за бугарските медиуми.