Торжествена прослава за Раѓањето на Пресвета Богородица, или кај народот познат како празникот Мала Богородица се случи во манастирот Пречиста кај Кичево. Голем број верници беа дел од вечерната Богослужба, која ја водеше Архимандритот Партениј, но и на утринска Света Литургија.
И за овој голем празник за Бигорската Обител, гостин беше Повардарскиот Митрополит на МПЦ-ОА, г. Агатангел.
-Утрото, пак, го најави своето торжество со радосниот пречек на нашиот драг гостин, Митрополитот Повардарски г. Агатангел, кој со посебно умиление и усрдност чиноначалствуваше со празничната Литургија, во чест на славното раѓање на Онаа, Која ја родила и Пречистанската Обител. Антифоното пеење на братскиот и сестринскиот хор од нашите манастири беше прекрасен молитвен венец со кој се круниса возљубената Небесна Владичица, зашто за Неа најубав подарок се нашите соборни молитви и нашето братољубие. Таа љубов се читаше на лицата на сите присутни кои го исполнија велелепниот Пречистански храм. Сета си љубов Владичице наша, сета си милост, прими го сега овој мал љубовен принос, како наша скромна благодарност за твоите штедри изблици на мајчинска нежност, со кои ги погали нашите срца!, велат од Бигорски.
ГАЛЕРИЈА БИГОРСКИ:
