Српската Православна Црква (СПЦ) доби на подарок значајна парцела во светиот комплекс Ал-Магтас, токму крај местото каде што свети Јован Крстител го крстил Господ Исус Христос. Подарокот е лична одлука на јорданскиот крал Абдулах Втори, кој преку принцот Гази бин Мухамед му ја соопшти на српскиот патријарх г. Порфириј.
Принцот, кој е главен советник на кралот за верски и културолошки прашања, ја пренел одлуката за време на посетата на патријархот Порфириј на Ал-Магтас на 7 декември. Парцелата што се подарува е лоцирана во најсветиот дел од комплексот, во непосредна близина на историското место на Христовото крштевање, кое ужива статус на заштитено светско наследство на УНЕСКО.
Патријархот Порфириј ја прифатил одлуката на кралот со „голема радост и благодарност“, истакнувајќи дека со овој чин кралот Абдулах Втори „се запишува со златни букви во историјата на Српската Православна Црква“. Подарената парцела се оценува како исклучително значајно признание за СПЦ, која досега не поседувала сопствено место во овој свет христијански центар.
За време на престојот во Ал-Магтас, принцот Гази бин Мухамед лично го прошета патријархот по Патеката на свети Јован Крстител, покажувајќи ги ридот на пророк Илија, изворот на свети Јован и местата поврзани со проповедта на Претечата. Делегацијата ја посети и групата древни цркви изградени меѓу 5. и 12. век, вклучувајќи ја и крстообразната крстилница на местото на Христовото крштевање.
Патријархот Порфириј престојува во Јордан на покана на кралот Абдулах Втори, а на 9 декември ќе учествува на меѓународната конференција „Процесот од Акаба – Балкански меѓурелигиски дијалог“, која ги обединува верските лидери од регионот со цел зајакнување на меѓурелигиската соработка.
Во придружбата на патријархот се митрополитите Хризостом и Методиј, епископите Кирило и Алексеј, протоѓаконот д-р Драган Радиќ, д-р Ведран Голијан, ѓаконот Никола Костиќ и иподјакинот Дејан Накиќ.
