Сотировски го честиташе Велигден на Вселенскиот Патријарх и на поглаварите на соседните православни цркви

Директорот на Комисијата за односи со верските заедници и религиозни групи, Даријан Сотировски воспоставува нова практика. Сотировски за најголемиот христијански празник Воскресение – Христово Велигден, испратил честитки до Вселенскиот патријарх  Вартоломеј и до поглаварите на Православните цркви од соседните држави,  Грчкиoт Архиепископ Јероним, Српскиот Патријарх Иринеј, Бугарскиот Патријарх Неофит и Албанскиот Патријарх Анастасиј.

-Дозволете ми да Ви упатам срдечна честитка по повод нај­го­ле­ми­от и најсветлиот, празникот на неизмерната радост Христовото Воскресение – Велигден. Ви упатувам искрени желби Христовото Воскресение да го дочекате во големо смирение, со срца полни со ра­дост и воскресенска љубов.

Денот на Воскресението е, да се радуваме во торжеството на праз­никот и да се прегрнеме еден со друг. На оние кои нè мразат да им речеме: браќа! И да простиме сé заради воскресението, како што стои во пасхалната стихира.

Овие зборови на дело да ги покажуваме целата година која е пред нас, затоа што денес не се потсетуваме и не си спомнуваме са­мо за историски настан, туку за вечната вистина. Само така вос­кре­сението ќе го почувствуваме внатре во нас самите, а истото ќе го почувствува и нашата татковина. Секој од нас е способен за по­веќе, за подобро за вистинска човечност која на дело треба да се покажува постојано, пишува директорот на КОВЗРГ, Даријан Сотировски во честитката испратена до поглаварите на православните цркви од соседните држави и до Вселенскиот Патријарх.

Поврзани написи:

Бугарски Епископ молитвено учествувал на литургија предводена од Архиепископот Стефан Се враќа монашкиот живот во манастирот Богородица-Пречиста кај Кичево ЕКСКЛУЗИВНО: Чудото во црквата во Трубарево се повтори за Нова Година Католичката црква задоволна од соработката со директорката на Комисијата за верски заедници