Пендаровски: Само со заедништво, солидарност и меѓусебна почит ќе дојдеме до личен просперитет и напредок

Претседателот Стево Пендаровски, упати честитка до граѓаните по повод христијанскиот празник Христовото раѓање – Божик.

„Од се срце посакувам празничните денови да ги пречекаме во добро здравје, радост и среќа споделувајќи љубов и хармонија со нашите најблиски. Празничните денови кои ги минуваме во нашите домови исполнети со светлина и топлина, нека не инспирираат да се грижиме и да им подадеме рака на сите на кои им е потребна материјална и духовна поткрепа.

Христовото раѓање е празник кој дава смисла на нашето човекување и ни ја всадува вербата во подобро утре исполнето со мир, љубов и благосостојба. Пораките на овој празник нека допрат до нашите срца и нека не следат цела година давајќи ни сила заеднички да се соочиме со сите предизвици кои ни претстојат. Само со заедништво, солидарност, разбирање и меѓусебна почит ќе дојдеме до личен просперитет и развој и напредок на нашата татковина.

Нека ни е честит Божик! Христос се роди!“ порача претседателот Пендаровски.