Митрополитот Дебарско-кичевски Георгиј и Епископот Антаниски Партениј имале прва официјална средба, по изборот на новиот архијереј на епархијата. Средбата се случила денеска во Митрополијата во Охрид.
Фотографии од средбата објавија и Епархијата и Бигорскиот манастир, а од нив се гледа дека Викарниот епископ на гости заминал со голема Бајадера и уште два подарока, кои не можат добро да се дефинираат.
Дебарско-кичевската епархија не објави детали од разговорот, додека Бигорскиот манастир посочи дека средбата поминала во „искрена и конструктивна атмосфера, исполнета со љубов кон Црквата Христова и со заедничка грижа за спасението на доверениот народ Божји“.
Најнапред, нашиот старец, од името на целата наша монашка заедница, му посака на митрополитот благословена и плодотворна архиерејска служба, душевно и телесно здравје, просветление и мудрост одозгора, за благобитието на епархијата, на монаштвото и свештенството, на верниците и на сите граѓани. Потоа, во текот на разговорот, старецот го запозна Високопреосвештениот со динамиката на мисијата и животот на нашата монашка заедница, како и со делувањето на светите манастири што се наоѓаат под негово духовно раководство. Се молиме и се надеваме дека оваа средба ќе биде почеток на плодотворна соработка, во духот на апостолското единство и евангелската љубов, на духовна полза за народот Христов, и за сите и за сѐ, стои во соопштението на Бигорски.
