МПЦ во Лондон: Синодот и Владиката Пимен да не молчат за нападот врз Отец Виктор
Црковните општини на МПЦО Св.Архангел Михаил во Лондон и Св Ѓорѓи Победоносец – Литлхамптон, бараат надлежните органи во Македонија да го расчистат случајот со нападот врз свештеникот Виктор Стојчев. Истовремено бараат, надлежниот архиереј, Владиката Пимен да се огласи за настанот, а воедно Синодот на МПЦ да побара заштита за своето свештенство од бруталните напади врз него.
Црковните општини на МПЦ во Лондон, случајот ќе го пријават и во британската полиција и ќе бараат заштита за Отец Виктор, кој воедно е и британски државјанин.
Во продолжение целосниот текст на соопштението:
Почитувани
На празникот Рождество Христово – Божиќ, кога од оправдани причини нашиот свештеник беше оневозможен да биде со сите нас, се случи брутален физички напад врз семејството на нашиот почитуван свештеник. Заштитувајќи ги сопствените деца и сопруга беше нападнат од разбеснета група и притоа му се нанесени тешки телесни повреди и скршеници.
Од проследените докази и изјавите на очевидците како и на надлежните полициски и медицински лица, ние црковниот одбор од на МПЦО Св. Архангел Михаил го осудуваме овој нецивилизирани и вандалски напад на нашиот свештеник и ја даваме нашата целосна поддршка нему и неговото прекрасно семејство.
Апелираме до надлежните органи во Р. Македонија во најкраток можен рок да ги преземат сите мерки за да се казнат сторителите на овој гнасен чин.
Повикуваме на смирение и воздржаност од секакви конфронтации со поддржувачите на силеџиите како и на целосна лојалност кон нашиот свештеник и мајката Македонска православна Црква.
Црковниот одбор и другите здруженија на Македонците во Обединетото Кралство ќе ги известат надлежните во Foreign Office и полицијата во Лондон за нападот врз отец Виктор кој е Британски граѓанин со што ќе бараме да влијаат на целосно расветлување на случајот и заштита на неговите човекови права.
Го повикуваме синодот на МПЦ да се огласи со соопштение и да го заштити својот клирик од грозоморните и тенденциозни изјави по социјалните мрежи и медиумите со кои се оправдуваат нападите на свештенството.
Конечно веруваме дека и надлежниот митрополит на Европска Епархија ќе даде соопштение и духовно го поддржи своето духовно чедо.
Отец Виктор, нека Бог биде со вас и вашето семејство и со сите нас во овие тешки моменти и нека ни даде сила и истрајност. Вие сте голем човек и сите членови од црковната општина ви посакуваат што поскоро опоравување.
Црковните одбори:
Св. Архангел Михаил и сите Свети Ангели- Лондон
и
Св. Ѓоргија Победоносец – Литлхамптон
