Почетна Вести Христијанство Монасите од Бигорски за коронавирусот и кризната состојба
Монасите од Бигорски за коронавирусот и кризната состојба

Монасите од Бигорски за коронавирусот и кризната состојба

941
2

Монашката Обител на Бигорски, заедно со Архимандритот Партениј испратија соопштение по прогласувањето кризна состојба во регионот во кој се наоѓаат Бигорскиот манастир и Манастирот во Рајчица. Ви го пренесуваме во целост.

Согласно новонастанатата состојба со ширењето на Covid-19 (корона вирус) во Македонија и препораките на Светската здравствена организација, на Вселенската Патријаршија и на Светиот Синод на МПЦ – Охридска Архиепископија, како и во согласност со најновите профилактички мерки на надлежните државни институции кај нас, со цел подобро справување и целосно спречување на ширењето на вирусот, ве известуваме дека од вчера пристапот до Бигорскиот Манастир е значително ограничен, додека пристапот до метохот „Свети Георгиј Победоносец“ во Рајчица е сосема забранет. Впрочем, поради тоа што Манастирот во Рајчица се наоѓа во непосредна близина на градот Дебар, каде што е епицентарот на вирусот во Македонија и каде има најголем број на заболени, главно поради повратниците од Италија, според решението на државните власти тој ќе се наоѓа во состојба на изолација во наредните 30 дена.

Исто така, ве известуваме дека со помош на Божјата благодат и по молитвеното покровителство на Светиот Јован Претеча и Крстител и на Светиот Великомаченик Георгиј Победоносец, досега сите монаси, монахињи и верници што се затекнаа во нашите манастири се со добро здравје и со силен дух. Дневниот богослужбен круг се одвива непрестајно, а зголемено е молитвеното ќелијно правило на монасите.

Смирено ве замолуваме, во овие благословени денови на Светата и Велика Четириесетница да ги удвоите своите лични молитви за поскоро и побезболно надминување на ова сесветско искушение, за брзо опоравување на заболените и за душевни и телесни сили на оние кои несебично се жртвуваат за другите и работат за спречување на инфекцијата.

Ве замолуваме и совесно да се однесувате кон правилата и препораките на надлежните државни органи, имајќи предвид дека, создадени за заедница и живеејќи во неа, сите ние сносиме одговорност и за нашите ближни, за луѓето во непосредна близина до нас, но и за оние кои се физички далеку од нас. Всушност, самопожртвуваната грижа за другите преставува акт на христијанска љубов.

Да го исползуваме ова современо искушение на човештвото не за паника, хаотичност и безнадежност, туку за лично покајание, за духовно очистување, просветление и преобразување и за личносно приближување до нашиот човекољубив Бог и Создател, Господ Исус Христос, Кој вели: Останете во Мојата љубов! Ако ги запазите Моите заповеди, ќе останете во љубовта Моја… Ова ви го реков за да остане радоста Моја во вас и радоста ваша да биде полна. Ова е Моја заповед: да се љубите еден со друг, како што ве возљубив Јас. Никој нема поголема љубов од оваа: да ја положи душата своја за своите пријатели. Вие сте Ми пријатели ако го вршите она што ви заповедам Јас (Јован 15,9-14).

Вистинската вера, дејствената љубов, искреното покајние, постот придружен со добри дела и молитвата, навистина прават чуда. Нема искушение што преку овие врховни добродетели и преку благодатта Божја не може да се надмине.

Ви посакуваме добро и богоугодно да го поминете остатокот од Светата Четириесетница, та по молитвите на Пресветата Владичица наша Богородица, Мајката Царица на Небото и на Земјата, да се удостоиме со радост и духовно веселие, неосудено и непречено да се поклониме на сесветлото Христово Воскресение – настан со кој засекогаш е победено најголемото искушение и страдание на човештвото, смртта. Нека благодатта од славното Воскресение биде со сите нас!

Остануваме неотклонливо со вас во љубовта Христова, принесувајќи Му ги постојано нашите смирени молитви за сите вас!

Коментар(2)

  1. Vasite molitvi vo ova tesko vreme ni se mnogu potrebni Gospod da go blagoslovi Otec Partenij I site monasi ood ovoj preubav manastir Bog e ljubov Bog pomegju site nas AMIN

  2. ONIE KOI GO LJUBAT BOGA,PATUVAAT BEZBEDNO NIZ TEMNINATA.TIE NE ODAT SO POGLED , TUKU SO VERBA. NIE CE SE MOLIME IMAJTE UBAVI I BLAGOSLOVENI DENOVI.

    VIE I SITE VO RAJCICA.SO GOSPOD NAPRED.NEKA NASITE MOLITVI BIDAT OBOSTRANI. NO VASITE MOLITVI SEGA NA SITE NAS MNOGU NI SE POREBNI.VO VASIOT PREKRASEN MANASTIR SEKOGAS SUM NAODJALA MIR,BIDETE BLAGOSLOVENI

НАПИШИ КОМЕНТАР

Your email address will not be published. Required fields are marked *