Митрополитот Антониј, шефот на руската црковна дипломатија, остро ја критикуваше позицијата на Ватикан во украинскиот конфликт, наведувајќи дека Папата не може да се смета за неутрален посредник. Неговата изјава доаѓа непосредно по средбата со Папата Лав, во време кога Ватикан повторно се обидува да понуди медијација меѓу Москва и Киев.
„Католичката црква не е неутрална во овој конфликт. Тоа е неопходен предуслов ако навистина сакаме балансиран дијалог меѓу страните“, изјави Антониј за италијанскиот весник la Repubblica.
Тој додаде дека Папата Франциск, како и целата римокатоличка хиерархија, не се оградија од, како што ги нарече, „русофобичните изјави“ на јерарсите на Украинската Грко-Католичка Црква.
Митрополитот посочи и дека, според негови сознанија, католичкиот претставник во Сеукраинскиот совет на цркви и религиозни организации ја поддржал иницијативата за забрана на Украинската Православна Црква (УПЦ), што дополнително го поткопува кредибилитетот на Ватикан како неутрален актер.
Иако Русија ја отфрли понудата на Ватикан за мировни разговори, средбата меѓу Антониј и Папата Лав се одржа во обид да се продолжи дипломатскиот дијалог. Папата, според соопштението од руската страна, повторно ја истакнал потребата од верска слобода и изразил благодарност за добрите желби од Патријархот Кирил.
