Претседателот на Македонската алијанса за европска интеграција (МАЕИ), Васил Стерјовски, упати честитка до новоизбраниот Митрополит на Корча, Неговото Високопреосвештенство г.г. Анастаси, по повод неговиот избор и устоличување во високата и света должност.
Во честитката, Стерјовски наведува дека овој избор претставува значаен момент за православните верници од Корчанскиот округ и за целата Автокефална православна црква на Албанија. Тој изразува уверување дека духовната мисија на Митрополитот ќе даде вреден придонес за зајакнување на православната вера, вредностите на мирот, љубовта и солидарноста, како и за поддршка на македонската православна заедница во Корчанскиот округ.
Стерјовски, исто така, ја нагласува важноста Светата Митрополија на Корча да биде отворен простор за сите верници, со почитување на нивните традиции и јазици, вклучувајќи го и одржувањето на богослужби на македонски јазик, во духот на единството и разновидноста на Православната црква.
На крајот од честитката, претседателот на МАЕИ му посакува на Митрополитот здравје, мудрост и сила во неговата висока духовна мисија, уверувајќи дека под негово раководство ќе се зацврстат вербата и хармоничниот соживот во Корчанскиот округ и во цела Албанија.
/vesnik-Ilinden
