Митрополијата на Китрос, Катерини и Платамона организира двонеделен летен камп за деца од Украина, како дел од својата пастирска и хуманитарна мисија. Кампот започна на 23 јули во селото Своронос, на три километри од градот Катерини, и ќе трае петнаесет дена.
Во кампот се згрижени деца од најпогодените региони во Украина, кои заедно со своите мајки добиваат можност да поминат мигови на одмор и безгрижност во безбедна и пријателска средина, соопштуваат од митрополијата.
Гостите за време на престојот посетуваат верски и археолошки локалитети, знаменитости на планината Олимп, крајбрежни области и културно-историски места, а исто така учествуваат и во бројни забавни и едукативни активности.
„Оваа иницијатива е дел од солидарноста и поддршката што нашата црква ѝ ја нуди на населението што страда, особено на децата кои преживеале трауми поради војната“, изјавија организаторите.
На 26 јули, децата и нивните придружници беа пречекани од митрополитот Георгиј, кој им посака добредојде и изрази поддршка. Присутните му се заблагодарија за топлиот прием и грижата што им се укажува во овој тежок период.
Иницијативи од ваков вид се реализираат и од страна на други грчки митрополии, кои во текот на летните месеци организираат кампови специјално наменети за украински деца погодени од војната.
