Филотеја, Фотина и Христина, се трите нови монахињи во сестринството на Рајчинскиот манастир, дел од Бигорската Обител.
Величествениот чин го извршил Дебарско-кичевскиот митрополит Тимотеј заедно со Игуменот, Архимандритот Партениј, во пресрет на големиот празник посветен на Манастирот Свети Ѓорги Победоносец.
Трите нови монахињи, претходно со имињата Мимоза, Флорина и Христина успешно го поминале искушеничкиот период во Манастирот, по што го добил монашкиот потстриг.
-Возбудено треперат срцата, ликуваат бројните присутни гости, нестрпливо очекувајќи го тој прекрасен момент, кога сите погледи и сите молитви ќе се слеат во глетката на трите сестри застанати крстовидно пред олтарот во длабок поклон. Тогаш настанува свечена тишина и секој го запира здивот да ги слушне новите имиња кои ќе го запечатат ова ново раѓање. Раѓање и живеење само за Бога. Живот во смирено послушание кон Старецот и сестринството. Живот рамноангелен, за слава на ангелите и пораз на демоните. Има ли поголема чест од тоа својот минлив краткотраен живот да го дадеш во залог за вечноста, служејќи Му со љубов, предано и до крај на Оној Кој претходно веќе го даде Својот живот за сите нас. На таква чест се удостоија трите Раички искушенички, Мимоза, Флорина и Христина, кои полагајќи го заветот пред небесната и земната Црква и стекнувајќи, преку раката на возљубениот ни владика, митрополитот Дебарско-кичевски Тимотеј, благослов за живот во монашки подвиг. Така се родија Филотеја, Фотина и Христина. Радоста е голема и за една нова рамноангелна душа, но кога заветот свечено се полага од три возљубени чеда на Старецот, тогаш кој може да ги опише копнежот, и надежта, и љубовта, и грижата, и радоста што во тој миг горат во неговото срце! Со татковски поглед ги следи, додека со преклонети глави и високо издигнати запалени свеќи стојат пред својот Творец, и во себе Му зборуваат со најумилен глас: „Подај ни светла облека, Христе Боже наш, Младоженецу на нашите души, Ти Кој се облекуваш во светлина како во облека“, велат од Бигорски.