Новиот Дебарско-кичевски митрополит Георгиј најавува соработка со епископот Антаниски Партениј, во своето прво интервју по интронизацијата за државната агенција МИА. Георгиј вели дека веќе разговарале со Партениј и дека наскоро ќе се видат, искажувајќи благодарност за честитките од Бигорскиот манастир за неговиот избор за митрополит.
-Епископот антаниски Партениј е мој собрат во Христа, кому му благодарам за неговите честитки по повод синодската одлука за избор на митрополит, како и за неговото присуство, заедно со дел од неговото братство, за време на епископската хиротонија и интронизација. Ние, се разбира, се слушнавме, а наскоро и ќе се видиме, вели митрополитот Дебарско-кичевски, во интервјуто за МИА.
Во истото интервју, Георгиј коментира неколку актуелни општетствени теми, како што е имотите на верските заедници, по неодамнешното медиунско истражување на оваа тема насловено, „Верски имоти под лупа“, посочувајќи дека имотот на Црквата е заеднички народен имот на нејзините верници од даренија во минатото и денес.
Тоа што го има, колку што го има е дополнителен показател за запазувањето и грижливоста на Црквата кон она што е заедничко и покрај многуте искушенија и тешкотии, за разлика од негрижата, продажбата и разнебитувањето на многу заеднички имоти, јавни претпријатија и општествени поседи на македонските граѓани во изминатите децении.
Од друга страна оданочувањето на Црквата како правен субјект, сметам дека е сложено прашање, првенствено поради комплексниот даночен систем во кој постојат различни видови на даноци во даночната политика на државата, но и спецификата на Црквата како правен субјект, за кој практично се неапликативни одреден вид на даноци.
Во таа насока најзначајно е да постои јасна и системски издржана правна рамка во однос на даночната основа, како и даночните ослободувања за верските субјекти. Еднаш донесен во инклузивна постапка и низ дијалог Законот, треба да се применува и не треба да биде предмет на чести измени и дополнувања кои предвидуваат дијаметрално спротивни решенија, што на крај секако резултира со низа недоследности. Црквата и сега плаќа различен вид даноци, а како и за сè друго негува конструктивен приод, вели во интервјуто Георгиј.
Митрополитот Георгиј ги коментира и последните најави за измени на законото за средно образование, со кои на верските училишта им се овозможува начин за признавање на дипломите.
-Средното богословско училиште е основано уште во 1967 година во еден посебен систем со карактеристично уредување, кога религијата е потисната од државата. Денес велиме дека живееме во слободно демократско општество, но сè почести и позасилени се обидите за ограничување и маргинализирање на верскиот израз, па и во однос на регулирањето на статусот на училиштето, прашање коешто неоправдано е оставено нерешено повеќе од една деценија.
Токму затоа загрижуваат тенденциозните обиди за неоправдани ограничувања во однос на новиот закон. На пример, за мене е сосема неразбирливо како Мрежата за заштита од дискриминација е против изедначувања на правата на учениците во верските училишта, иако тоа веќе јасно е одамна предвидено во Законот за верските заедници каде стои дека „верските образовни установи се изедначени со другите образовни установи и нивните ученици и студенти ги имаат истите права и обврски“. Односно, кого ќе го заштитиме од дискриминација со тоа што ќе ги дискриминираме овие ученици? Зарем не треба да погледнеме како тоа го имаат решено и другите секуларни европски држави? На пример, во европските, но нам блиски земји, Романија и Бугарија, секуларниот принцип не попречил средните богословски училишта да бидат целосно интегрирани во државниот образовен систем, вели новиот Митрополит на МПЦ-ОА.
