Архиепископот Стефн повика на единство и сплотеност по трагедијата во Кочани. Во апелот на поглавараот, пред најавените протести, стои повик да се сочува мирот и истовремено повик за молитва за настраданите.
Апелот на архиепископот во целост.
Возљубени во Господа,
Минува третиот ден од ужасната трагедија во која животите ги загубија 59 невини наши млади чеда, а над стотина се здобија со тешки повреди. Оттогаш, Светата Македонска Православна Црква постојано се моли за спасение на невино настраданите, служејќи помени за упокоените и принесувајќи молитви за исцеление на повредените, како и за утешение на нивните семејства и ближни.
Во овие дни на траор го повикуваме верниот наш народ заедно да ги сосредоточиме срцата во молитва кон Господа, просејќи од Него да ги прими душите на новопретставените чеда Божји во прегратките Авраамови, а, пак на повредените да им дарува побрзо оздравување.
Народната сплотеност и единство најмногу се огледуваат и се најпотребни во вакви злокобни неприлики. Затоа, ги повикуваме сите верни чеда на Мајката Македонска Црква и сите граѓани на Македонија ̶ да го сочуваме мирот во себе и мирот меѓу себе и, прилежно молејќи се, достоинствено да тагуваме.
Со Божји благослов,
АРХИЕПИСКОП
ОХРИДСКИ И МАКЕДОНСКИ
СТЕФАН
