Архиепископот Илија, поглавар на Православната црква во Финска и модератор на Централниот комитет на Светскиот совет на црквите, објавил реакција во врска со предложениот американски нацрт-план за постигнување мир во Украина. Во својата изјава, тој навел дека документот „не е охрабрувачки“ и дека содржи одредби кои отвораат сериозни прашања за правичноста и ефективноста на предложеното решение.
Архиепископот посочил дека посебно загрижувачка е точката која се однесува на измените во украинското законодавство за верска слобода, што според него може да се толкува како мерка насочена исклучиво кон заедниците поврзани со Московската патријаршија. Тој потсетува дека за време на неговата официјална посета на Украина минатиот месец не забележал дискриминација по верски основи, туку соработка меѓу религиските заедници, вклучително и во областите најпогодени од војната.
Во изјавата се наведува и дека предизвиците со верската состојба во регионот произлегуваат од улогата на раководството на Руската православна црква. Архиепископот потсетил дека патријархот Кирил фактички ја поддржува идејата за „света војна“, што дополнително ја усложнува ситуацијата и го отежнува религиозниот дијалог.
Според Архиепископот, делот од нацрт-планот кој се однесува на враќањето на украинските деца и затвореници е недоволен. Тој потсетил дека илјадници деца се однесени на руска територија и дека е потребен многу појасен и поцврст механизам за нивно враќање.
Во заклучокот, Неговото блаженство навел дека траен и одржлив мир не може да се постигне без јасно именување на неправдите и без обезбедување одговорност за сторените злосторства. Според него, секоја идна мировна иницијатива мора да биде заснована на фактите и да гарантира безбедност и достоинство за украинското население.