Американскиот теолог и библеист Вудроу Мајкл Крол во својата нова книга Денот кога умре Исус изнел тврдење дека со споредување на библиските сведоштва, античките хроники и астрономските пресметки може со исклучителна прецизност да се определи времето на Христовата смрт. Според него, сите податоци изненадувачки се поклопуваат: Исус Христос умрел во петок, на 3 април, 33. година по Христа, околу 15:00 часот, пишува британскиот Daily Mail.
Евангелието според Марко (15:34) наведува дека Исус умрел во „деветтиот час“. Бидејќи еврејскиот ден започнувал во 6 часот наутро и бил поделен на 12 часови, деветтиот час одговара на околу 15 часот по современо време. Сите четири евангелија се согласуваат дека распнувањето се случило на „Денот на подготовката“ – петок, непосредно пред еврејската сабота.
Крол ги анализирал астрономските податоци и утврдил дека 3 април, 33. г. се совпаѓа со пасхалната полна месечина. Истата вечер во Ерусалим било забележано делумно лунарно затемнување, што ѝ дало на Месечината црвеникав тон – феномен познат како „крвава месечина“. Овој опис се поврзува со зборовите на апостол Петар (Дела 2:20): „…и месечината ќе се претвори во крв“.
Распнувањето се случило под власта на прокураторот Понтиј Пилат (26–36 г.). Крол претпоставува дека неговата колебливост можела да биде последица на политичкиот страв по падот на неговиот покровител Сејан во 31 година. Археолошки докази – како „Пилатовата плоча“ од 1961 г. и остатоците од распнат човек од 1968 г. – потврдуваат дека евангелските наративи одговараат на историјата.
Крол ги цитира и паганските хроничари Флегон и Талос, кои споменуваат темнина и земјотрес за време на 202-та Олимпијада, што завршува во 33 година – во согласност со библиските описи за натприродната темнина на денот на Христовата смрт.
Авторот го вклучува и пророштвото Даниел (9, 24–27): 483 години од заповедта за обновување на Ерусалим (445 г. пр.н.е.) водат до 33 г. по Христа – токму годината на Пасхата на која Христос е распнат. Според Крол, фактот што смртта на Исус се случува на 14 нисан, во истиот час кога се принесувале пасхалните јагниња, го зацврстува теолошкото значење на Христос како „Јагне Божјо“.
Некои научници тврдат дека распнувањето се случило во среда. Крол ја отфрла оваа хипотеза како несоодветна со еврејскиот календар и текстот на Евангелијата. Во античко време „Ден на подготовката“ секогаш означувал петок, а саботата започнувала со зајдисонце. Средата не би се совпаднала ниту со календарот, ниту со пророчката логика за „три дена и три ноќи“.
Книгата на Крол веќе привлекува внимание меѓу научниците. Авторот смета дека науката и верата не се во спротивност, туку дека заедно можат подобро да го осветлат настанот кој, како што вели, „го променил текот на човечката историја“.